Albistea Berria egunkariaren bidez jakin dugu. Hala ere, erabakia oraindik ez omen da behin betikoa, hurrengo egunetan gertatzen denaren zain egon beharko dugu beraz. Galiziako taldeak TKE liga uzteko erabaki hau, diru faltagatik eta egin beharreko bidaia luzeengatik hartu omen du. Cabo da Cruz TKE ligaren sortzaileetako bat izan zen eta azkeneko sei denboraldiak goi mailan egon da. Azkeneko denboraldian bederatzigarren amaitu zuen. Albiste hau baieztatzen bada, hurrengo hilabeteetan toki hori betetzeko lehia eta saltsa nahiko egongo da. Nork beteko du Cabok utzitako lekua?

Ez dute ozen esaten baina azkenean Espainiako Trainerila txapelketan atzemandako morfina positiboak Astillerorenak izan dira. Lau hilabete behar izan dituzte emaitzak emateko eta atzemandako substantzia helburu terapeutikoekin hartutakoa dela diote eta ez dagoela debekatua. Azkenean positiboen espedienteak artxibatuta gelditu dira. Egia esateko guzti honetan Espainiako Federazioak ez du oso argi jokatu. Hurrengorako mesedez, gaixo dauden arraunlariak etxean gelditu daitezela.

Ur Kirolak igandean egindako ezohiko batzarrean, Donostiarra proiektuaren alde egitea erabaki du. Erabakia gehiengo zabalaz hartu dute, bazkideen %94ak aldeko jarrera izan du. Beraz Urki, Arraun Lagunak eta Udalarekin batera lanean jarraitzeko prest dago. Orain desadostasunak konpondu beharko dituzte eta helburu eta funtzionamendu berriak argitu. Eta erabaki honen ondorio garrantzitsuenetako bat, Donostiarra beste urte batez KAE-1 ligan lehiatuko da. Hona hemen Urkik komunikabideei banatutako informazioa Irutxuloko Hitzan ikusgai.

Donostiako lagun koadrila batek Pasaia-Donostia arraunean egin du Ameriketatik ontzian. Ontzi hau Albaola elkarteak eraikitako XIX. mendeko arrantza-traineru baten erreplika da. Arraunzaleak gustura aritu ziren Patxi Arbillaga patroiaren gidaritzapean. Honek nahiko lan izan zuen hegomendebaldeko haizea zuzentzen. Pikatxia paretik igarotzerakoan, olatuak gainera zetozela zirudien, baina arraunei gogor eraginda aurrera egin zuten. Ondoren Donostiara iritsi eta badiara kostata sartu ziren. Portuan indarrak berritzeko hamaiketako eder bat zain zeukaten. Baina estropada ez zen hemen amaitu, berriz ere ontzira igo eta Pasaiaruntz bueltan jo baizuten, hori bai oraingo honetan belaren laguntzarekin. Esperientzia ederra benetan!

Hondarribiako patroiarekin elkarrizketa:

Hurrengo denboraldirako taldea sendotu omen dute eta onenen artean egoteko helburua dute. Gero eta estropada gehiago errekan egiten ari direla eta, ez dago ados, estropadak itsasoan egin behar direla uste du. Gaur egun goikoen artean egoteko fitxatzeak ezinbestekoak direla badaki baina gero eta etxeko jende gehiago gero eta hobeto. Datorren denboraldia onenen artean egotea opa diogu! Patroiarengatik behintzat ez da izango!

Arraunaren II. Gala ospatu zen joan den astean Castro Urdialesen eta bertan denboraldiko estropadarik onenaren saria jaso zuen Zarauzko alkateak, Jon Urienek. Ekitaldia SER irrati kateak antolatu zuen. Urienek, Turismo bulegoko langileei Zarauzko estropadak antolatzen egiten duten lana eskertu zien eta Zarauztarrentzako ere izan zituen eskerrak, estropadak antolatzen sortu daitezkeen enbarazo eta eragozpenak gogo onez hartzen dituztelako eta estropadetan giro ederra jartzen dutelako. Bejondeiela!

Donostiako udalak traineru bateratuaren alde gutun bat argitaratu du Irutxuloko HITZA egunkarian. Bertan diote, proiektuaren sinesgarritasunak hondoa jo duela, batez ere, bi kluben arteko zuzendaritzen harreman txarrak direla eta. Baina ez dute etsi nahi eta hurrengo urtean ere trainerua KAE-1 ligan egotea nahi dute. Horretarako Kaiarribaren oinarria handitu nahi dute eta beste dimentsio bat eman nahi diote jende gehiago erakarrita. Herritarrei dei egiten diete proiektuan parte hartu eta bere iritzia plazara dezaten, eta beste hainbeste eskatzen diete Ur Kirolak eta Arraun Lagunakeko bazkideei. Nahi izan ezkero hemen duzue zuen iritziak argitaratzeko plaza!

Igande honetan, azaroak 16, Benta Berriko Kiroldegian Donostiako X. Indoor Arraunketa Estropada Herrikoia jokatuko da. Iaz adin, sexu eta baldintza fisiko guztietako 400 parte hartzaile izan ziren. Hiru proba jokatuko dira 500m eta 2000m- ko estropadak eta  distantzia luzeko ordubetekoa. Ez baduzue izenik eman behar animatzera ere joan zaitezkete. Badakizue hitzordua igande honetan hamar terdietan.

Gipuzkoako Arraun Federazioko (GFA) presidente berriari elkarrizketa:

Talde guztien arteko elkarlana bultzatu nahi du, talde haundi eta txiki, eta guztien iritzia kontutan hartu. Batzuk diotenaren kontra, Gipuzkoako arrauna ez omen dago egoera txarrean baina, hori bai, lanean jarraitu beharra dagoela dio. Zorte ona opa diogu Iñigori eta Zuzendaritza berriari!

Iñigo Alkainek Josetxo Etxeberria ordezkatuko du Gipuzkoako Arraun Federazioko buru bezala. Iñigo Alkainen hautagaitzak Josetxo Aranbururen (San Pedro) hautagaitzari aurre hartu zion Irailaren 30ean egindako hauteskundeetan. Zuzendaritza berria honako hauek osatzen dute: Koldo Díez (Hondarribia) lehendakariorde , Ekaitz Balenziaga (Getaria) diruzain, Ignacio Martin idazkari eta beste batzordekideak, Luis Mari Goikoetxea (Zumaia), Josetxo Fernández Vaqueriza (Arraun Lagunak), Iñigo Arruti/Ramón Alkain (Orio) eta Manuel Roteta (Fortuna). Batzorde berriak astelehen honetan ospatuko du bere lehen bilera.

San Pedroko entrenatzaile izendatu berriak taldea utzi du. Orain dela gutxi egin genion elkarrizketan esaten zuen moduan, erronka oso gogorra zuen aurrean baina gogoz eta ilusioz zegoen. Hala ere gauzak ez dira nahi bezala atera, San Pedroko arraunlari batzuk taldea utzi dute eta gaur egungo egoera ez omen da denboraldi bukaerakoa. Gaizkak uste du ez direla taldea zuzentzeko beharrezko baldintzak betetzen. Azkenean taldea uzteko erabakia, taldeko zuzendaritzarekin batera adostu du. Orain nork ordezkatuko du San Pedron? eta Gaizka non arituko da hurrengo denboraldian?

Arraunlari Lezoarrak Hondarrabiko bidea hartu du. Azken urtean Donostiarra traineruan aritu da arraunean eta aurretik Zarautzen ere ibili izandu da. Zortea opa diogu bere ibilbide berrian!
Bitxikeri bat, Donostiarreko entrenatzailea, Luis Mari Etxart bere aita da. Agian fitxaketa honek Donostiarra traineruaren etorkizuna argitzen du...

Elkarrizketa Txinpart Zarauzko arraunlariarekin:

Oporretatik etorri berri da arraunlari donostiarra. Hiru urte daramatza Zarautzen arraunean eta aurretik Ur Kirolak-en aritutakoa da. Gustura dago aurten egindako denboraldiarekin eta Zarauzko taldean duten giroarekin. Donostiar bezala, Donostiako traineru bateratua eskatzen du. Hogeitamazazpi urte ditu eta ez omen zaizkio arraunean urte gehiegi gelditzen, baina oraindik sasoi baterako txinparta badu...

Aurreko astean estropa.net-en egin genion elkarrizketan, Bermeora itzultzeko zituen gogoak aipatzen zituen. Hala ere bere zalantzak zituen arraunean jarraitu ala ez jarraitu. Azkenean, jarraitzea aukeratu du eta gainera etxean bera nahi zuen bezala. Zortea opa diogu bere herriko taldean!

Irutxuloko Hitzan jakin izan dugunez, Donostiarraren lehen etapa bukatzear da. Emaitza kaxkarrek eta kluba osatzen duten kluben ¬Ur Kirolak eta Arraun Lagunak¬ arteko desadostasunek proiektua eta sinatutako hitzarmena bertan behera uztera bultzatu dute Udala. Udaletxean egin duten azken bileran kluba birsortzea proposatu du Udalak, baina Urkik ez omen du onartu. Tamalez guzti hau Goenkale telesailaren itxura hartzen ari da...

Arraunlariek hilabete pasatxo eskas baino ez dute, nolabait esatearren, deskonektatzeko. Traineru denboraldi ofiziala uztaila hasieran hasten da normalean, eta iraileko hirugarren edo laugarren asteburuan amaitu. Baina hiru hilabeteko iraupena ere ez duen garai horretarako prestaketa zortzi hilabetekoa da! Beharrezkoa al da hainbeste entrenamendu egitea? Hainbeste hilabeteko lana? Ziurrenik bai, ez dakit, baina esango al lidake norbaitek zertarako hasten diren hain garaiz??

Gaur baieztatu da azken egunetan arraun guneetan bolo bolo zebilen zurrumurrua. Hamabost denboraldi Orio Arraun Elkartean arraun egin ondoren Hondarribin ariko datorren denboraldian arraunean Ibon Etxeberria oriotarra.

Ezin ona izan aurtengo Arkoteren balantzea. Taldearen eta Izortz beraren helburua kategoria mantentzea zen...eta nahiz eta iazko maila baino hobea eman, azkenean jaitsi egin da 'Plentziarra'.

Hurrengo urtean arraunean jarraitu ala ez jarraitu zalantzak dauzka...