Kalka baborrai!

Konparazio batera...

Kalka baborrai — Wed, 15 Jul 2009 17:24:05 +0200

Orio Athletic izan daiteke. Gorritiraino zabaldu izan da ijitoen kantera. Hori bai, Bilbotarrek Castillo baino gutxiago ordaindu dute azken Mirotza. Castrok Real Madril edo Bartzelona izan behar du. Utzi Etxaberi Guardiolaren korbata janzten: ez dakit La Marinerak zerbezaren liga, Txapelketak eta Kontxa hiru sariak irabaziko dituen, baina ez da urruti ibiliko. Zaila egiten zait San Pedro kokatzen: goiko muturrean, hirugarren mailan eta ostera ere izarren ligan eta banderak irabazten ikusteko aukera izan dugu. Valladolid, Ponferradina edo Sevilla, ez da erraza Baldarenak konparatzea. Urdaibai eta Astillero, Chelsee eta Manchester City. Zumaia eta Zarautz, Betis eta Español. Arkote, Recreativo eta Hondarribia, Valentzia.

Ez da ariketa erraza. Zaila da arraunlariak eta futbolariak konparatzea, eta askorentzat txorakeria.

Reala. Zeinek izan nahi du Reala, bigarren mailan eta kiebran dagoen klub historikoa?

Euskal Pastela!

Kalka baborrai — Wed, 08 Jul 2009 16:31:03 +0200

Bidean harrituta utzi ninduen, bigarren hilaran autoa utzi eta okindegira sartu zenean. Ez ninduen harritu autoa bigarren filan utzi izanak. Okindegira sartzeak bai, ordea: Euskal Pastela paperean bilduta atera zen adiskide arraunlaria. Momentuan jateko zela esan arren, paperean bildu zion etxekoandre zintzoak. Di-da batean irentsi zuen, momentuan jateko zelako astearte buruzuri batean bere buruari egin zion oparia.

Denboraldia hasi berrietan Euskal Pastela jatea, oparia baita arraunlarientzat. Gizarajoak, matrail-hezurra bistan ikusten ditut herriko arraunlariak. Ezpainak eta belarriak besterik ez zaizkie ikusten. Gazteak eta beteranoak, patroia eta gerri-gerrian joaten direnak, denak gosetuta. Bi letxu hosto eta gelatina. Arraina labean eta bainak. Makarroiak estropada egunean. Ez omen dute besterik jaten. Neguan hamar kilo hartzeko habilidadea duen beste adiskide arraunlari batek binaka irensten ditu txokolate tabletak. Aspaldian umorea galduta ibiliko da gizona. Hark ez du, seguru aski, Euskal Pastelik aspaldian dastatu.

"Pastela... uretan zakau guk pastel ederra!". Hala esan dit gaur, bere buruari okindegira sartzea galarazi dionak. Amorrazioak janda dabil mutila. Barkatu, janda balitz, gaitzerdi!

Nire zazpiak

Kalka baborrai — Wed, 03 Sep 2008 12:21:26 +0200

Halere, bost traineru seguru jotzen ditugu ia denok, eta bi posturako koadrila asko, kolore asko. Urtero izaten da konplikatua osteguneko porra asmatzea, aurten ere ez dago samurra, baina isilik egotea da errezena eta ez arriskatzea, errezagoa.

Hemen nirea: Urdaibai, Castro, Orio, Astillero, Zarautz, Pedreña eta San Pedro.

Jarri zuen porra. arriskatuz gero, "nik esan nin" eta halakoak esateko aukera izaten da, asmatuz gero.