Dokumentu Akzioak
Jose Manuel Francisco Urdaibaiko entrenatzailea izango da
Oraindik ofiziala ez den arren, Jose Manuel Francisco Bermeon arituko da entrenatzaile bezala. Astillerorekin kontratua du beste urtebetez baina lotura eteteko eskatu die Astilleroko buruzagiei. Horrela, Kantabriarren entrenatzaile izateko aukera handiak dituena Jon Salsamendi oriotarra da. Aulki mugikorrean emaitza onak lortu ditu azken urteotan eta denboraldi honetan traineruaren buru izango da ziurrena.
Bermeoko taldeak bost fitxaketa burutu ditu: Alain Colunga(Orio), Jon Albizu, Xabier Olazar(Arkote), Antonio Montenegro(Castro) eta Asier Arego, aurreko urteetan Bou Bizkaiaren patroia izandakoa. Jose Manuel Franciscorekin batera beste hiru arraunlari eramango ditu Astillerotik: Luis Pazos, Oscar Viudez eta Fernando Rua. Fitxaketa hauek burutzerakoan galiziarraren onespenarekin gauzatu dira. Xabier Bereziartua, Santi Zabaleta, Jon Beitia eta Gotzon Unanuek kluba utzi dute eta Juantxu Duñabeitiak ere uzteko asmotan dabil. Aldaketa ugari Urdaibaien denboraldi berriari begira baina helburu finko eta garbi batekin: Goi-mailan aritzea eta banderak lortzea. Momentuz bidea egiten hasiak dira Bermeo aldean.
