Dokumentu Akzioak
Sanpedrotarra Arraun Elkartea martxan da
Aurreko igandean presidentea eta zuzendaritza berria izendatu ondoren, Sanpedrotarra Arraun Elkarteak ez du denbora galdu nahi eta lanean gogor hasi dira dagoeneko. Josetxo Aranburuk gidatuko duen kluba argi du ezin dela dena bukaera arte utzi eta talde sendoa osatzeko helburu garbiarekin ekin diote San Pedroko buruzagiek denboraldi berriari. Entrenatzailea Gabi Larrinaga izango da eta 20 arraunlari ditu gutxi gorabehera. Asier Carballeda beraien artean.
Atzo argitaratu genuen albistean, Asier Carballeda Hondarribian zegoela ohartarazi genuen. San Pedron geratuko da ziurrenik. Pixkanaka arraunlari batzuk bueltatzen ari dira eta nahiz eta bajak izan, traineru indartsua ateratzeko itxaropenarekin daude. Denboraldi bikaina burutu ostean, bloke berdina mantentzea zaila izango zela argi zuten baina lanerako espiritua berdina baldin bada ez dute arazo handirik izango TKE Ligan aurrean egoteko. Oraindik lan asko egin behar dute San Pedro aldean baina bide onetik doazte eta gerra emateko asmo sendoarekin.
