"Azken urteotan, abenduko oporraldia Euskal Herriarekiko sentimendua dugun kirolariok biltzeko erreferentzi garaian bihurtu da. Urte sasoi honetan, inoiz baino gehiago, Euskal Herria aintzat hartzen dugun kirolariok, elkar ezagutzeko, bat egiteko eta gure ibilbide propio bat, elkarrekin egiteko gogoa zein beharra sentitzen dugu.

Atzerrian edo etxean, banaka zein taldeka, neskak eta mutilak, amateur edo profesional izan, egoera berdintsua dugu. Elkarrengandik banatzen, elkarren aurka jartzen eta elkarri bizkar ematera eramaten gaituzten federazio eta txapelketetan gaude murgilduta.

Guk, gure herria maite dugun kirolariok, sentitzen dugun maitasuna ordezkatua izan dadila nahi dugu; maite dugun herria ofizialki ordezkatu nahi dugu. Sentitzen dugunari uko egin gabe egin nahi dugu kirola.

Zazpi lurraldeetako kirolarion artean, Euskal Herriko kirol munduak duen aberastasun osoaz etorkizunerako oinarriak jartzen hasiak gara. Bat egite eta uztartze gune berri bat osatzen ari gara.

Kirola nagusi izango den arratsalde honetan, ez dira beste hainbat bertso, musika eta antzerki adierazpen ere faltako. Egitarauan aipatutako ez ditugun sorpresarik ere izango da. Jende olatu handi bat espero dugu habian dugun estropadarako".

Zatoz!!

                                                                                          Euskal Herriko Kirolariak