Dokumentu Akzioak
Gipuzkoako Kirol Prentsa Elkarteak, Korta, Aitor Balda eta Pako Prieto omendu ditu
Gipuzkoako Kirol Prentsa Elkarteak atzo gauean eginiko galan, Jose Luis Korta, Aitor Balda eta Pako Prieto omendu zituen. 2009 denboraldian burututako eta lortutako emaitzengatik saritu zituzten. Aitor Balda eta Pako Prietoren kasuan, hainbat urte arraunaren munduaren egon eta gero, arrauna uzten dutelako omendu zituzten. Jose Luis Korta aldiz, Kaikun jarraituko du entrenatzaile bezala. Nahiz eta urteak aurrera joan, Ortzaikaiko gizasemeak ez du arrauna uzteko asmorik.
Pako Prieto, 40 urtez Pasai Donibaneko presidentea izan da. Ibilbide oso luzea gauzatu du talde arrosean. Urrian kargua uzteko erabakia hartu zuen. Jende berriari paso ematea beharrezkoa zela iruditu zitzaion. Horrela, Antxon Sistiagak hartu zuen lekukoa garai berri bati hasiera emanez. Aitor Baldak ez ditu hainbeste urte egin arraunean. San Pedron hasi zen oso gazte. Libiaren garai onenak ezagutu zituen eta Kontxako bi bandera lortu zituen. San Pedro uztearekin batera, arrauna alde batera utzi zuen. Hala ere, Bermeotik jasotako eskaintza onartu zuen urte batzuk beranduago. Urdaibaien lan ona burutu ostean, etxera bueltatu zen. Oraingo honetan, arraunlari eta entrenatzaile bezala. Moreak berpizteko helburuarekin onartu zuen erronka. TKE Ligara igo ziren. 2008an, San Pedro bederatzi urte eta gero Kontxarako sailkatzea lortu zuen eta aurreko denboraldian TKE LIgan 2.postuan amaitu zuten. Pako Prietok eta Aitor Baldak utziko duten hutsunea handia izango da. Arraunari agur esan diote. Orain beste batzuen ordua da.
